Shinikizo kubwa la damu ni nini?

Shinikizo kubwa la damu hutokea panapokuwa na ongezeko la

nguvu ya msukumo wa damu katika mishipa inayochukua damu kutoka kwenye

moyo kwenda kwenye viungo na tishu mwilini. Ukubwa wa shinikizo

hilo la damu unategemea wingi na nguvu ya msukumo wa damu

kutoka kwenye moyo na ukubwa wa mishipa inayopeleka damu

mwilini. Katika vituo vya tiba kifaa maalum hutumika kupima

shinikizo la damu na kiwango kinachochukuliwa kuwa

cha kawaida ni 120/80 mmHg au chini yake. Pale kiwango

kinapokuawa 140/90mmHg au zaidi hali hiyo huwa ni

shinikizo kubwa la damu, kama inavyoelezwa katika mwongozo

wa viwango vya shinikizo la damu. Hata hivyo panaweza kuwepo

tofauti kati ya mtu na mtu.

DALILI ZA SHINIKIZO KUBWA LA DAMU.

Kwa kawaida hakuna dalili za wazi zinazojitokeza pale ambapo una

shinikizo kubwa la damu. Utafahamu kama una shinikizo kubwa la damu kwa

kufanyiwa kipimo katika kituo cha tiba. Endapo shinikizo lako la damu litakuwa

liko kiwango cha juu sana unaweza ukaumwa kichwa mara kwa mara hasa

sehemu ya kisogo, ukapata kizunguzungu, ukatokwa na damu puani, ukapata

maumivu ya kifua, moyo kwenda kasi wakati umepumzika, ukashindwa kufanya

mazoezi kwani utashindwa kupumua, kuyasikia mapigo ya moyo wako wakati

umepumzika na kupata uchovu wa mara kwa mara.

Jedwali la mwongozo wa viwango vya shinikizo la damu

Shinikizo la damu Kiwango cha shinikizo la damu

Kiwango cha kawaida 120/80 au chini yake

Kiashiria cha mwanzo wa shinikizo

kubwa la damu

Kati ya 121/80 na 139/89

Shinikizo kubwa la damu 140/90 au Zaidi

Kwa bahati mbaya watu wengi huishi na tatizo hili kwa muda mrefu bila

kufahamu kwani hakuna dalili zilizo bayana. Mara nyingi shinikizo kubwa la

damu hutambulika pale unapokwenda kituo cha huduma ya afya kupima afya

yako au kupata matibabu ya tatizo jingine la kiafya. Hali hii humweka mtu

katika hatari ya kupata ugonjwa wa moyo hivyo ni muhimu kuwa na tabia ya

kupima afya yako mara kwa mara.